Can vei la lauzeta

Bernart de Ventadorn , Can vei la lauzeta

Can vei la lauzeta mover
de joi sas alas contra.l rai,
que s’oblid’ e.s laissa chazer
per la doussor c’al cor li vai,
ai! tan grans enveya m’en ve
de cui qu’eu veya jauzion,
meravilhas ai, car desse
lo cor de desirer no.m fon.

Ai las! tan cuidava saber
d’amor, e tan petit en sai,
car eu d’amar no.m posc tener
celeis don ja pro non aurai.
Tout m’a mo cor, e tout m’a me,
e se mezeis e tot lo mon;
e can se.m tolc, no.m laisset re
mas dezirer e cor volon.

Anc non agui de me poder
ni no fui meus de l’or’ en sai
que.m laisset en sos olhs vezer
en un miralh que mout me plai.
Miralhs, pus me mirei en te,
m’an mort li sospir de preon,
c’aissi.m perdei com perdet se
lo bels Narcisus en la fon.

De las domnas me desesper
ja mais en lor no.m fiarai;
c’aissi com las solh chaptener,
enaissi las deschaptenrai.
Pois vei c’una pro no m’en te
vas leis que.m destrui e.m cofon
totas las dopt’e las mescre,
car be sai c’atretals se son.

D’aisso’s fa be femna parer
ma domna, per qu’e.lh o retrai,
car no vol so c’om deu voler,
e so c’om li deveda, fai.
Chazutz sui en mala merce,
et ai be fai co.l fols en pon;
e no sai per que m’esdeve,
mas car trop puyei contra mon.

Pus ab midons no.m pot valer
precs ni merces ni.l dreiz qu’eu ai,
ni a leis no ven a plazer
qu’eu l’am, ja mais no.lh o dirai,
Aissi.m part de leis e.m recre;
mort m’a, e per mort li respon,
e vau m’en, pus ilh no.m rete,
chaitius, en issilh, no sai on.

Tristans, ges no.n auretz de me,
Qu’em m’en vau, chaitius, no sai on.
De chantar me gie e.m recre,
E de joi e d’amor m’escon

_________

Relevant: La laudeta (at poésie mode d’emploi)

Comments are closed.

%d bloggers like this: